ПУЛС – Піддукляньскый умелецькый людовый субор
Професіоналне умелецьке тілесо, котре оформлює музично-вокалный і танечный фолклор Русинів із резіденційов у Пряшові. Выникнув як Піддукляньскый україньскый народный ансамбель – часть Україньского націоналного театру (днесь Театер А. Духновіча) у 1955-ім році. Пізніше здобыв Штатут MK 9341/71 – Um.
Попередником ПУЛС-у быв професіоналный Україньскый народный ансамбель пісень і танців, основаный 9. 2. 2. 1953 р. із резіденційов у Меджілабірцях і на Цемяті коло Пряшова. Директором быв Юрій Костюк, котрый быв до 1958-го року і першым умелецькым ведучім ПУЛС-у. В далшых двох сезонах ансамбель умелецькы вели Юрій Цімбора і Людмила Поліакова, пак Штефан Ладижіньскый /рр. 1960 – 1965/. В роках 1968 аж 1972 ансамбель вела і формовала выразна особность хореоґрафії Меланія Нємцова. Од 1976-го року до року 1979 быв умелецькым ведучім Рудолф Смотер, од 1980-го року Андрій Гнат, аж до 1989-го року. В роках 1990 – 1993 умелецькы вів ансамбель Владимір Любимов. В роках 1993 – 1996 ансамбель вів Владимір Марушін. В роках 1996 – 1999 вычеряв го Рудолф Смотер,
наслідно в періоді років 1999 – 2003 быв умелецькым ведучім Юрай Швантнер, і в роках 2003 – 2008 Мірослав Мороховіч. У 1991-ім році назва ансамблю змінила ся на Піддукляньскый умелецькый людовый субор (перед тым Піддукляньскый україньскый народный ансамбель).
Од януара 2008-го року ПУЛС орґанізачно одокремив ся і його зряджовательом є Пряшівскый самосправный край. По одділіню быв директором і выразным творцьом новой умелецькой твари ансамблю Владимір Марушін /рр. 2008 – 2014/, і в роках 2014 – 2024 Юрай Швантнер, котрый привів ансамбель ку выразному взоступу в новодобій історії.
Танець
Першыма хореоґрафами ПУЛС-у были Владимір Лібовіцькый і довгорочна ведуча умелецька особность Меланія Нємцова /рр. 1957 – 1973/. По їй одході перевзяв веджіня танечного колектіву довгорочный соліста Іван Чісарик /рр. 1973 – 1979/. В роках 1979 – 1980 і 1984 – 1991 тілесо умелецькы вела педаґоґ і хореоґрафка Станіслава Семянова-Селчанова. В роках 1980 – 1983 формовав ансамбель як умелецькый шеф Юрій Ґоґа, котрый діяв у ансамблі в позіції хореоґрафа од 1971-го року. Пізніше курто стояв на челі ансамблю хореоґраф Павол Шірак /рр. 1983 – 1984/. В роках 1985 – 1989 танечну часть вела знова Станіслава Семянова- Селчанова. В роках 1991 – 1996 перевзяв умелецьке веджіня танечник і хореоґраф Владимір Марушін. По його одході працовав танечный колектів ПУЛС-у, в роках 1997 – 2001, знова під веджіньом Юрія Ґоґы. Ведучім і хореоґрафом танечного колектіву став на період років 2003 – 2008 Мірослав Мороховіч. По одділіню в 2008-ім році умелецькы профіловав танечный колектів хореоґраф Владимір Марушін і ведуча танця Анна Марушінова. В роках 2014 – 2023 вів тоту часть довгорочный соліста і выразна особность сцены Юрай Велебір. По його одході перевзяв функцію на період єдного року танечник і хореоґраф Віліам Микула.
Хор, Орхестер
Першым хормайстром і єдночасно умелецькым ведучім быв Юрій Костюк. Далшыма особностями, котры помогли до выбудованя професіоналного хору, были Юрій Цімбора (так само композітор), пак Штефан Ладижіньскый. Хормайстром із найдовшым діяньом при хорі ПУЛС-у быв Мірослав Бурґыр /рр. 1963 – 1977/, котрого вычеряв Вацлав Двожак. Його професіоналный приступ выпрофіловав хор ПУЛС-у на елітне тілесо співаюче нелем ансамбльовый репертоар, але з легкостьов звладаючо і класічный репертоар. Далшов особностьов хору быв Владимір Любимов, котрый діяв як хормайстер в роках 1984 – 1993. По його одході дішло ку частковій редукції голосів, што оддзеркалило ся в репертоарі хору, поступно трансформованого на меншый співацькый хор.
