Репертоар
ПУЛЬС ся прімарно заміряє на традіції Русинів, жыючіх на выходнім Словеньску, але і на фолклор іншых реґіонів Словеньска, перекомпонованый до вышшой сценічной формы.
Його репертоар обсягує і творчость, котра переступає рамець фолклору і сполучує го з різныма жанрами, чім ПУЛЬС займає єдинечне місце на умелецькій сцені.
Танечна зложка є творена професіоналныма танечниками. Їх умелецькый прояв ся вызначує знанём людового танцю і його реґіоналных одлишностей, овладанём далшых танечных технік (класічный і модерный танець), драматічным проявом, прецізностёв, дінаміков і высоков технічнов нарочностёв, часто збогаченов елементами акробатікы. Танечникы дokажуть інтерпретовати розлічны хореоґрафії – од традічных людовых танців аж по модерны і інсценованы композіції. Каждоденна розманіта рухова і кондічна підготовка забезпечує їх неперестанный професіоналный ріст і умелецьку вшестранность.
Співацька зложка є творена професіоналныма співаками. Венує ся інтерпретації людовых співанок переважно русиньского етніка, але тыж співанок з різных реґіонів Словеньска. Співакы ся презентують у хоровій і сóловій подобі, і то в рамках традічного матеріалу і його умелецькой штілізації. Частёв їх репертоару суть далшы музычны жанры, наприклад мюзікл ці попова музика. Хор комбінує спів з рухом на сцені, што звышує выразову і драматічну годноту представлінь. Реґуларна голосова підготовка і робота на репертоарі забезпечують їх неперестанный умелецькый розвой.
Орхестер творять професіоналны музиканты, котры інтерпретують людову музику в традічній і высоко штілізованій подобі. Їх музычный прояв ся вызначує штіловов інтерпретаціёв, технічнов зрілостёв і чутём про фолклорный характер музикы. Дякуючі своїй музычній вшестранности овладають музиканты і далшы музычны жанры і докажуть ся приспособити розлічным умелецькым проєктам. Орхестер супроваджує танець і хор, причім ся в рамках представлінь презентує і самостатныма проґрамовыма выступами.
Зістаньте в образі
НОВОТЫ
Зажыйте ПУЛС нажыво!
Не роздумуйте!
Контактуйте нас, і мы выступиме якраз у вашім місті або селі, в інтерьері або в екстерьєрі, із умелецько цінным, і про публіку інтересным представліньом.